ភ្នំពេញ៖ សម្ដេចធិបតី ហ៊ុន ម៉ាណែត នាយករដ្ឋមន្រ្តីកម្ពុជា ប្រកាសតម្លើងឋានៈដល់ប្រធានមន្ទីរនៅតាមបណ្ដារាជធានី-ខេត្ត ពីប្រធានមន្ទីរមានតួនាទីស្មើអនុប្រធាននាយកដ្ឋាន ឡើងស្មើប្រធាននាយកដ្ឋាន ដើម្បីលើកទឹកចិត្ត និងស័ក្តិសមនឹងតួនាទីដែលរាជរដ្ឋាភិបាលបានប្រតិភូអំណាច កិច្ចការងារទៅដល់មន្ទីរនានានៅថ្នាក់ក្រោមជាតិ។

សម្តេចធិបតីថ្លែងដូចនេះក្នុងពិធីបិទសន្និបាតបូកសរុបលទ្ធផលការងារឆ្នាំ២០២៣ និងលើកទិសដៅការងារឆ្នាំ២០២៤ របស់ក្រសួងមុខងារសាធារណៈ នារសៀលថ្ងៃទី០៤ ខែមេសា ឆ្នាំ២០២៤ រាជធានីភ្នំពេញ។

សម្តេចថ្លែងថា៖«ដើម្បីជាការលើកទឹកចិត្ត និងផ្តល់ទម្ងន់បន្ថែម[...] ប្រធានមន្ទីរកម្រិតនាយកដ្ឋានស័ក្តិ៣ ឥលូវយើងរៀបចំជំរុញឱ្យប្រធានមន្ទីរឡើងស័ក្តិ៤ ឡើងកម្រិតនាយកដ្ឋានតែម្តង»។

សម្តេចធិបតីបានបញ្ជាក់ពីមូលហេតុនៃការតម្លើងកម្រិតនេះគឺ ជាការលើកទឹកចិត្តបន្ថែមទៅលើមន្រ្តីដែលនឹងត្រូវទទួលលើកិច្ចការងារនេះកាន់តែច្រើន ខណៈប្រធានមន្រ្តីគឺជាសេនាធិការជូនអភិបាល គណៈអភិបាលរាជធានីខេត្ត។

សម្តេចធិបតីបានបញ្ជាក់ទៀតថា ប្រសិនបើផ្តល់ការងារច្រើនដល់ប្រធានមន្ទីរតម្លើងកម្រិតឱ្យគឺមិនខុសនោះទេ តែគឺការលើកទឹកចិត្ត និងការចូលរួមលើកកម្ពស់សិទ្ធិអំណាចនូវការទទួលខុសត្រូវ។ សម្តេចគូសបញ្ជាក់ថានៅពេលដែលកំពុងធ្វើវិមជ្ឈការការទទួលខុសត្រូវច្រើនទៅឱ្យរាជធានីខេត្តគឺកាន់តែមានភាពចាំបាច់ និងសារៈសំខាន់ចាំបាច់ឱ្យមានសង្គតិភាពរវាងការអនុវត្តថ្នាក់ក្រោមជាតិ ជាមួយនឹងថ្នាក់ជាតិ៕